Plattküer Friedag – Düwel, was dat giestern wier nen langen Dagg – muorns üm Klock Sieb’n all an‘ Schriewdischk siätten, Klock Acht den iärsten Termin in Greipen (de Fahrt üöwer Reckenfeld – häww ne guete halwe Stunne duert…). Dat passede jüst, datt ick to Klock Teihn bi de Mobilitätskonferenz wieer in Detten in’n Lichthof sien konn. De gonk bes kuort nao Meddag. Dann wieer an’n Schriewdischk.
Aobends Klock Sess in’t Raothues – Sitzung – un de häbbt alles giewen: Et was halv Teihn düör äs ick dao wieer drut kuemen sin…
Et gonk üm de Reinigung von de städtschken Hüüser, de eenen willt, datt de Stadt dat sölwes mäck, – Eegenreinigung nüemt sick dat, – de annern willt dat vergiewen nao extern, – Fremdreinigung. De „Externen“ häbbt wunnen, süss har ick vondage een Beld met Büörgermester met Bessen in de Hannen hat.
Et gonk üm de Duorpstraote in Hembiärgen de nu, wo den Greivschken Damm sperrt is, unnürsel vull Verkiähr häww, et gonk üm de Krüüssung Borghorster Straote met de Amtmann-Schipper-Straote, et gonk üm de Kiärkstraote, Sandufer.
De Krüüssung Mönsterstraote/Hagenkamp/Marienstraote, dao sall’t nen Mini-Kreisel giewen. Dao is heel lange üöwer küert wuorn.
De niee Tempo-Diärtig-Zone an de Norwöllschke Straote werd nich bis an den Zebra-Striepen verlängert… Dat was, wat mi jüst spontan noch inföllt, dao wassen noch ne iälke annere Saaken to beküern.
Vanaobend sall’t auk wull wieer ne lange Sitzung giewen. – Plattdüütschken Stammdischk – wie seiht us!
Danke für Ihre Nachricht. Wir werden diese schnellst möglich bearbeiten.