Plattküer Friedagg – Leiwe Fründe von de plattdüütscke Spraoke, von AllesDetten un von’t Liäben an sick.
Sett’t ju iärst äs dahl, vondage duert dat luck länger, ick häbb ju ne Menge to verklör’n:
Wi wassen düsse Wiärk up Besichtigung in’n Kinnergaoren. Iärst häbbt de us binnen ne Menge viärtellt un dann gong et nao buuten, een wahne grautet Gelände. Dao harr ick een Deja Vu. Dat is uut de Spraoke von den Franzmann un hett „all maol seihn“. Dao satt nen Jungen in’n Sandkasten, de was an’t iäten, Prinzenrolle, häbb ji sicker auk all hat, de dubbelten Kekse met Schokolade daotüschken.
Vüör mien inneret Auge, ick kann auk nao binnen kieken, häbb ick mi sölwes äs lütten Bengel dao sitten seihn, daomaols harr ick noch blonde, fast witte Haore, jüst so äs so’n Prinz un Prinzenrolle gaww’t auk all. Dao, häbbt de us viärtellt, Prinzen satten ümmer up’n Piärd, – in’n Kinnergaoren gong auk nen Biäsenstieel äs Piärd düör. Vull later häbb ick dann erfahren, datt Prinzen auk all maol an Hüüserwänne pinkeln doht…. – dao wull ick dann kinn’n Prinz miähr sien.
Vanaobend is wieer plattdüütscken Stammdischk. Viellicht, wett dao ja noch üöwer dat een off annere Deja Vu küert.
Ick sölwes sin nich daobie, de Klöppeljungs un -wichter uut de Biärge häbbt to’n Kommers von’t 100-jäöhrige Jubiläum inladen. Dao giff’t Saoterdag wieer nen grauten Umtög met unnürsel vieel Veriene, Trummeln und Fleiten un kiegen Aobend ne graute Beach-Party!
Vull Plasseer an alle, – maakt wat druut.
Danke für Ihre Nachricht. Wir werden diese schnellst möglich bearbeiten.