Freitag, 21. November 2025 Guten Morgen Emsdetten

Plattküer Friedag – Vondaage giff’t ne Menge to vertellen also spar ick mi den Smalltalk vüörweg:
Dettske Platt häww Stammdischk, vanaobend Klock Sess bi Engeln up de Kiärkstraot – sotosäggen in Detten up de Ki – un daomet sin wi auk all bi’n Karneval – off füffte Jaohrestiedt, äs man auk wull sägg. Vanaobend werd de niee Stadtprinz bekannt giewen. Wu faken säggt se, dat eenen Karneval in de Wiege leggt wuorn is? Dütt Jaohr is et anners harüm, dütt Jaohr is et so, datt nich Karneval em sonnern he an Karneval in de Wiege leggt wuorn is. – OK, dat is all ne iälke Jaohre hiär aower up Rausenmondag häff de niee Prinz iärstemaol brüllt, – off dat sofort een Helau wesst is, dat is nich üöwerliefert. Wi will’t auk noch nich teviell verraoten, eegentlick weet ick et ja auk noch nich, is all’s män bloß Spekulation.
Vanaobend is aower auk Premiere bi de Aohlinnelschke Laienspiellers met iöhr plattdüütschke Theater. Ick sölwes sin giestern bi de Generalprobe all dao west – et launt sick wisse. Wenn’t vondaage noch nich klappt, kümmert ju drüm, datt ji Karten kriegt, – dat mott man seihn häm’n.